Golden Eagle Ylli për herë të dytë në histori të klubit ka fituar Ligën Unike. Therandasit në një sfidë shumë interesante fituan ndaj Pejës me rezultat 74:80.

Ndeshja nisi me ritëm të barabartë, por Ylli e mbylli çerekun e parë në epërsi 21:27. Skuadra nga Theranda ruajti avantazhin edhe në periudhën e dytë, duke shkuar në pushim me rezultat 41:46. Në çerekun e tretë, Ylli e thelloi epërsinë në 54:60, ndërsa në periudhën e fundit e menaxhoi mirë lojën dhe e mbylli takimin me rezultat 74:80.

Te Golden Eagle Ylli u dallua Scott Bamforth me 22 pikë, 5 asistime dhe 4 treshe të realizuara, ndërsa Erjon Kastrati shtoi 15 pikë. Nga Peja, më efikasit ishin Cecil Ëilliams me 17 pikë, Dequian Bracey me 16 dhe Dejon Davis me 13 pikë.

MVP i Final 4 u shpall Scott Bamforth, i cili ndeshjen finale e mbylli me 22 pikë, shtatë kërcime e pesë asistime.

Vendi i tretë i takoi Besëlidhjes

Final 4 i Ligës Unike u zhvillua në Tiranë.

Kupën për kapitenin e Yllit, Gëzim Morina, ia dorëzoi Presidenti i FSHB-së, Avni Ponari.

Ndërkohë, çmimin për MVP e dorëzoi Ersi Oruci, Sekretar i Përgjithshëm i FSHB-së.

Medaljet e arta i kanë ndarë Avni Ponari dhe Fatmir Gashi, nënkryetar i FBK-së, kurse medaljet e argjendta Adriatik Rraci, Zëvendës Sekretar i Përgjithshëm i FBK-së dhe Drejtor i Përfaqësueseve të Kosovës dhe Ylli Ujka, President i Klubit të Basketbollit Besëlidhja.

Ndërkohë, medaljet për vendin e tretë janë ndarë nga Valdet Spahija.

Pas ndeshjes finale me mirënjohje është nderuar Ylli Ujka për organizimin e Final 4, çmim që ia dhurua nga Avni Ponari, e po ashtu janë nderuar edhe gjyqtarët e finales, çmime që u ndan nga Adriatik Rraci dhe Ersi Oruci.