Liga Unike po vazhdon me edicionin 2024-25 në të dyja konkurrencat.

Kjo garë zhvillohet mes skuadrave nga Kosova dhe atyre nga Shqipëria.

Tetë skuadra garojnë te meshkujt për trofeun e çmuar dhe gjashtë te femrat.

Shpërblimet do të jenë të barabarta si te meshkujt, ashtu edhe te femrat.

Kampioni do të fitojë gjashtë mijë euro, finalisti tre mijë euro, derisa gjysmëfinalistët nga 1500 euro.

Liga Unike

Liga Unike Femrat

6 mijë euro kampioni

3 mijë finalisti

1500 gjysmëfinalistët

Liga Unike Meshkujt

6 mijë euro kampioni

3 mijë finalisti

1500 gjysmëfinalistët

Në ndeshjen më interesante të xhiros së parë të Ligës Unike, Sigal Prishtina shënoi fitore ndaj Vllaznisë me shifrat 85:84 (25:29, 15:14, 23:22, 22:19).

Hero i skuadrës prishtinase ishte Cory Reeves me dy pikë, tre sekonda pa përfunduar ndeshja.

Skuadra shkodrane në çerekun e parë ishte më e mirë, duke pasur epërsi disa herë deri në shtatë pikë, ndërsa periudha e dytë ishte e baraspeshuar, ashtu si edhe e treta. Fituesi u vendos në dhjetë minutat e fundit, ku herë njëra skuadër kishte epërsinë e herë tjetra dhe të dyja kishin mundësinë për të fituar, por Reeves në momentet e fundit shënoi pikët vendimtare dhe të fitores për Sigal Prishtinën.

Reeves e mbylli ndeshjen me 15 pikë e gjashtë kërcime, ndërsa Muhamedali Janjeva me 19 pikë, ndërsa te mysafirët më të mirët ishin Dy'quavis Wilkins me 27 pikë e 12 kërcime dhe Maurice Walton me 23 pikë e 13 kërcime.

Sigal Prishtina ka dy fitore, ndërsa Vllaznia dy humbje.

Golden Eagle Ylli fitoi përballjen ndaj Tiranës me rezultat 87:59 (32:12, 16:22, 26:14, 13:11), në javën e parë të Ligës Unike.

Ylli shkëlqeu nga fillimi, ku në çerekun e parë krijoi dallimin e madh, që ishte vendimtar për këtë sfidë. Therandasit e fituan këtë çerek 32:12, dhe epërsinë prej 20 pikëve e ruajtën deri në fund, ku fituan 87:59.

Te vendasit u dalluan Hasahn French me 28 pikë e dhjetë kërcime, William Tavares me 19 pikë, katër kërcime e katër asistime dhe Jalen Nesbitt me 14 pikë e 12 kërcime, ndërsa te mysafirët u dalluan Frenki Lilaj me 26 pikë e dhjetë kërcime dhe Endrit Hysenagolli me dhjetë pikë e 13 kërcime.

Tani të dy skuadrat kanë nga një fitore dhe një humbje.